Mense

Personeel

L43380892 Medium
 

Hoof

Hoof Medium
Johan Stronkhorst trotse skoolhoof sedert 2000.

Mnr.  Stronkhorst – wie is hy regtig?
Deur Claudia Groenewald

Ons ken hom as “Mnr. Stronkie” - ‘n gawe en vriendelike meneer wat almal op die naam groet met ‘n glimlag. Maar wie is hy regtig, wie skuil agter daardie breë glimlag, wat maak hom so geliefd onder leerders en onderwysers? Die Rissiepit het ‘n paar vrae aan hierdie gewilde skoolhoof van Middelburg Hoërskool gevra.

Wat het Meneer geïnspireer om ‘n skoolhoof te word?
Kinders het my geïnspireer – en die geleentheid om in hulle lewens ‘n verskil te maak.

Waar is Meneer gebore en hoe was Meneer se lewe as ‘n jong kind?
Ek is gebore in Pretoria, het in Kroonstad grootgeword en daarna Johannesburg toe verhuis en daar gewoon tot op 18-jarige ouderdom.

Wie is Meneer se gunsteling rugbyspan en rugbyspeler?
Ek is ‘n vurige Cheetah-ondersteuner en Marcel Coetzer my gunsteling speler.

Wat is Meneer se idee van ‘n romantiese tyd saam met Meneer se geliefde?
Om by St. Luciameer te wees teen sononder met ‘n glas goeie wyn, kaas, beskuitjies en mossels, en om te luister na die seekoeie en die krokodille in die agtergrond.

Is Meneer ‘n diereliefhebber?
Ja, ek is. Ek gaan stap graag smiddae met my drie brakke.

Waar gaan hou Meneer graag vakansie?
Ek hou daarvan om gereeld nuwe plekke te besoek. Tussen die bosveld en die see ontspan ek altyd baie lekker.

Wat doen Meneer graag in Meneer se vrye tyd?
Ek hou van visvang en jag.

Indien Meneer ‘n gunsteling fliek het, wat is die fliek se naam? Wie is Meneer se gunsteling akteur/aktrise?
My gunsteling fliek is “On Golden Pond” en my gunsteling aktrise is Meryl Streep.

Indien Meneer een wens kon maak, waarvoor sou Meneer graag wens?
Vir gesondheid!

Ten slotte laat Mnr. Stronkhorst ons met die volgende gedagte: “Mag hierdie uitgawe van ‘Die Rissiepit’ al die Middies laat besef hoe bevoorreg ons is. Mag dit dié wat reeds hulle kant bring en ook dié wat nog bietjie lyf wegsteek, inspireer om net hulle beste te lewer!”

 

Adjunkhoofde

Adjunkhoofde Medium

Bestuurspan

Bestuur Medium

Afrikaanse Departement

Afrikaans Medium

Daar is geen beter eienskap as om ‘n goeie woordeskat te hê nie. Dit is een van die vele dinge wat ek in Afrikaans as vak geleer het. Hierdie periode pak ek met plesier aan, want ek leer elke dag iets nuuts. Dink net hoe groot sou die vernedering wees as ek “op pad” en “huis toe” steeds as een woord sou skryf. Ek moedig elke leerder aan om hierdie vak ten volle te benut en te geniet. Onthou, soveel tale as ek kan, soveel male is ek man. – Pauli Verwey, gr. 12
Woorde kan gesprekke en boodskappe ophelder, ‘n glimlag op iemand se gesig sit en harte warm maak – Afrikaans leer my hoe om dit te doen. – Hestie Botha, gr. 12

English Department

Engels Medium
English is the most important subject at MHS. With an interesting curriculum and competent teachers that are passionate about the English language there is no better place to learn English as subject than at MHS. It’s no secret that the world is predominantly English and I can certainly say that when I leave school I’ll be able to face the world with a grin and greet it with the utmost confidence in English.  – Jan-Adriaan Naudé, gr. 11

Wiskunde Departement

Wiskunde Medium
Wisk Gelet Medium

Wiskunde is soos ‘n langdeelsom. Of dit nou faktorisering, euklidiese meetkunde of trigonometrie is, elke DEEL is vir jou ‘n uitdaging. Tog lê daar ‘n salige bevrediging in elke MAAL wat jy ‘n probleem oplos. Hoe meer jy van Wiskunde ontdek, hoe meer kan jy die aantal onbeantwoorde vrae van die raaisel van die lewe AFTREK. Ten einde is Wiskunde pret, maak dit vir jou deure oop en ontwikkel dit jou denke. Wiskunde leer jou dat daar vir elke probleem ‘n antwoord is. – Greta Kurpershoek, gr. 10

Wetenskappe Departement

Wetenskap Medium

Wetenskap vereis baie fokus, selfmotivering en pligsgetrouheid. ‘n Wetenskapstudent moet soos ‘n waterstofatoom wees. Daar is altyd die uitsondering op die reël.
Ek geniet die vak omdat dit my daagliks uitdaag om buite die platboomfles te dink. Ek let op in die klas en Middies se wetenskaponderwysers is die bunsenbranders wat die liefde vir die vak aan die brand hou. Ek is nie mal oor wetenskap omdat ek geniaal is nie, maar eerder omdat ek lank met probleme kan sit en worstel. ‘n Belangrike ding om in gedagte te hou is dat jy nie probleme kan oplos met dieselfde denkwyse as waarmee jy dit geskep het nie.  ‘n Persoon wat dus nie die waagmoed het om iets nuuts te probeer nie, begaan nooit ‘n fout nie en ontdek nooit iets nuuts nie.
Logika sal jou van punt A na punt B neem. Verbeel jou jy is ‘n waterstofatoom en wees die uitsondering. Wonder en droom oor die klein dingetjies wat tot nuwe ontdekkings kan lei omdat jy as leerder wetenskap se toekoms is. –Liz-Mari Lombard, gr. 10

Inligtingstegnologie (IT) en Rekenaarstoepassingspraktyk (CAT)

IT Medium

Ons lewe in die tegnologiese era. In alle beroepe sal mens met ‘n rekenaar moet werk. En indien jy RTT (Rekenaar Toepassingstegnologie) of IT (Inligtingstegnologie) as vak by die skool neem, moet jy maar weet dat jy al jou maats (en huismense) met hulle rekenaars moet  help. In die IT-klas val die fokus op programering en in RTT is die fokus op die werking van die rekenaar. Beide vakke is nogal moeilik, maar hier by Middies het ons uitstekende onderwysers wat die angel uit die vak haal. –Thea Uys en Christiaan Bezuidenhout, gr. 11

Kunste en drama Departement

Kuns Medium
Die Dramatiese Kunste as agtste vak is net nog ‘n geleentheid vir Middies om hulle passie uit te leef. Alhoewel dit as ‘n agtste vak aangebied word, is daar heelwat leerders wat dit neem. Die een week behandel ons die interessante geskiedenis van teaters, dramaturge en akteurs. Die volgende week is dit tyd om ons kreatiwiteit na vore te bring in die vorm van opvoerings. Ons is ook geseën met ‘n juffrou wat saam kan lag en ‘n bok vir sports is. Dramatiese Kunste is ‘n universiteitstoelatingsvak en dit is baie harde werk. Ons almal geniet dit om ons passie te kan uitleef en besef dat ons ‘n wonderlike talent ontvang het om so tuis te kan wees op die verhoog  – iets wat baie leerders vrees en nie kan doen nie. Daarom staan die dramastudente nie een tree terug vir enige ander akademiese vak nie. – Elsje-Mari Breytenbach, gr. 12

Landboudepartement

Landbou Medium
Landboutegnologie is ‘n vak waar ons leer hoe om prakties die plaastoerusting- en masjinerie te gebruik. Landboubestuur leer jou hoe om fisies te boer, bv. hoe om seleksie van diere toe te pas om beter teelmateriaal in jou kudde te verseker.  - Jaco Jacobs, gr. 11

Toerisme

Toerisme Medium

Toerisme neem mens op ‘n reis deur die wêreld. Ons beplan toere en ontdek so nuwe wêrelde en kulture. Ons leer hoe om die estetiese te kan waardeer, want in elke land is daar kultuurerfenisse en kunsskatte. Toerisme is ‘n vak wat ‘n mens se lewensuitkyk verbreed en jou wanderlust aanwakker. Ons is nie bang om ons vlerke te sprei en nuwe horisonne te ontdek nie.  - Engela Volschenk, gr. 11

Ingenieursgrafika en Ontwerp

IGO Medium
IGO gee jou meer insig oor hoe goed gebou en ontwerp word… En dit leer jou om geduldig te wees… En dit is glad nie maklik nie… Dit is beslis nie vir sissies nie.        –Vickus Smit en Mari Kuhn, gr. 11

EBW

EBW Medium
Besigheidstudie is daardie een vak waaroor almal mal is gedurende die kwartaal, maar wanneer die eksamen aanbreek, is dit jou grootste nagmerrie!
Al huiswerk wat ‘n mens eintlik kry, is opsommings. SO BAIE OPSOMMINGS! En niemand waag dit om onvoltooide werk te lewer nie. Jou skrif is meer op datum as mnr. Bertus se detensielys.
Tog is dit ‘n gunstelingvak. Solank jy net die filosofie van Besigheidstudies onthou: wie nie leer nie, kom nie deur nie. – Pauli Verwey, gr. 12

Geografie en SW

MSW Medium

Die geografieklasse is uiters uniek en ons leer elke dag iets nuuts. Wanneer ons werk, kan ons berge versit. Hier leer ons KLIPhard om die wêreld ‘n beter plek te maak … een groen spoor op ‘n slag. – Jean Lombard, gr. 11

Ek hou van geskiedenis, want dit is interessant om te leer van die groot wêreldgebeure, soos die wêreldoorloë en wat die uitwerking daarvan op Suid-Afrika is. En ons kry klas by ‘n baie oulike juffrou. – Eugenie Botha, gr. 9

Verbruikerstudies

Verbruikers Medium

Voedseltegnologie is … mmm … lekker. Nie net leer jy oor kos nie, jy kry geleentheid om dit te maak en te eet ook. – Bianca Venter en Kyla Schutte, gr. 9

LO Departement

LO Medium

Life orientation is a subject that teaches you how to cope with difficulties that you face, teaches you the correct way in which to do certain tasks and helps us younger generation to keep safe and healthy. – Nicole Hartslief, gr. 10

Religiestudies

Religie Medium

Administratiewe Personeel

Admin Medium

Bemarking

Bemarking Medium
Die bemarkingskantoor sorg dat Middies op almal se lippe bly en dat Middelburg se hart in ritme klop met die skool in groen en goud.

Jeugwerkers

Jeugwerkers Medium

Sport

Sport Medium

Terreinbestuur

Terrein Medium

Immergroen Middies glo steeds in geloof en plig

Deur
Engela
Volschenk
15 oud-Middies se harte klop steeds groen en hulle dra steeds hulle streepmuisbaadjies met trots. Hierdie 15 personeellede het by Middelburg Hoërskool gematrikuleer en hulle trap steeds diep spore hier in Middieland.
Mev. Gerda (Haycock) Claassens skryf matriek in 1975 en haar liefde vir sport kom al van skooldae af. Daarom is haar kosbaarste herinnering dan ook elke oggend se atletiekoefening. Haar atletiekafrigter het haar soggens vyfuur opgelaai om te gaan oefen. Sy sê ook dat baie van hulle Duits as ‘n vak geneem het omdat mnr. Winterbach vir hulle omgegee het. Verder onthou sy die rugbywedstryde teen Tek – wat MHS altyd gewen het! ‘n Laaste herinnering is die keer toe ‘n seunsdirigent haar op sy skouers gedra het toe sy die interhoër gewen het. Almal was blykbaar mal oor dié seun.
Mev. Hannelize (De Jager) Adendorff en Marion (Bronkhorst) Duvenage matrikuleer in1979. Juf. Hannalize sê dat haar gunsteling periode op ‘n Vrydag in die Afrikaanse klas was. Hulle onderwyser was mnr. IP Venter en dan het hulle Huisgenoot blokkiesraaisels ingevul. Sy sê tong in die kies dat sy nog ‘n Middie is, want sy kry nêrens anders werk nie.
Mev. Annemarie (De Kock) Wilke was vanaf in 1978 tot 1982 in MHS. Sy onthou die volgende hoogtepunte uit hierdie tyd: 1500 leerders, 80 personeellede, wen elke jaar Interhoër-atletiek. Haar rekord van 26.0 sek. in die 200m het vir 32 jaar gestaan! (‘n Atleet van Helpmekaar het hierdie rekord gebreek.) Sy onthou ook dat Middies elke jaar die rugby teen HTS Middelburg gewen het. Dit is ook hier waar sy haar man, Pierre Wilke, ontmoet het. Sy was in gr. 9 en hy was in gr. 11. Juf. Annemarie beskou dit as ‘n absolute voorreg om steeds haar streepmuisbaadjie te kan dra en ‘n Middie te kan wees.
Mev. Louisa (Holtzhausen) du Plessis matrikuleer in 1984. Sy en haar man, Christo, het al op skool uitgegaan. Hulle is gestraf omdat hulle op die gras voor die hoof se kantoor gesit het en hulle knieë aan mekaar geraak het. Dissipline was báie streng in die tagtigerjare.
Mev. Estelle (Vermaas) Klaassen matrikuleer in 1985. Die gange van Middies herinner haar daagliks aan kosbare skooldae… “Hier het ek geleer wat vriendskap en lojaliteit beteken. Van my beste herinneringe is hoe ons jaar na jaar die ‘Rooies’ gewen het. Ek onthou ook dat ek byna elke dag pak gekry het op my hande omdat ek so baie gepraat het … selfs dít kon my nie stilmaak nie. Ek sal altyd ‘n Middie bly, want my bloed is groen en ‘only a Middie knows the feeling’.”
Mev. Mandy (Bothma) van der Westhuizen matrikuleer in 1988. Sy onthou die vlotte wat hulle in die aande gebou het vir die karnaval, die sokkies in die saal met al die deure wat oop is, die kuiers by die rivier en die Tek-Derbys wat MHS altyd gewen het. Juf. Mandy is steeds ‘n Middie, want haar bloed is groen! Sy is nou al 23 hier by MHS as onderwyser en woon al 15 jaar op die terrein. Sy beskou Middelburg Hoërskool as haar huis.
Mev. Sumarie (Barnard) van Niekerk en Alti (Taljard) Nel is matriekmaats in 2001. Juf. Suma sê dat haar hoërskooldae die lekkerste tyd van haar lewe was omdat sy elke dag geforseer was om tyd saam met “haar maatjies” te spandeer … en natuurlik ‘n bietjie te werk ook. En dit is presies die rede hoekom sy steeds ‘n Middie is. Juf. Alti se kosbaarste herinnering aan haar skooldae is toe sy in 1999 die Interhoër spiesgooirekord gebreek het … mét ‘n beseerde hand. Sy is steeds ‘n Middie, want sy hou van die “vibe” hier by MHS.
Mev. Heleen (Van Staden) Smit skryf matriek in 2002. Sy spot altyd en sê dat sy eers in haar gr. 11-jaar “die lig gesien het” of “tot bekering gekom het” toe sy vanaf ‘n ander skool in die dorp by MHS aangesluit het. Haar kosbaarste herinneringe is aan Middies se personeel. Sy beskryf hulle as ‘n “ander tipe spesiaal”. Hulle het haar dadelik tuis laat voel en ook soos ‘n iémand laat voel. By Middies het sy die volgende geleer: As dinge moeilik raak – loop dit af, as jy verward is – kry beheer; geel en groen – vang die oog. Juf. Heleen is steeds ‘n Middie, want sy kon nie so gou groet nie. Sy wou ‘n rukkie langer deel wees van die “Middie-magic”.
Mev. Lezaan (Rossouw) Janse van Rensburg skryf matriek in 2007. Haar skooldae roep herinneringe op van lang, sorgvrye dae propvol pret. Juf. Lezaan onthou haar eie dae op die netbalbaan as ‘n hoogtepunt in haar skoolloopbaan. Haar lewenspad het haar terug gelei na MHS toe en sy is steeds ‘n trotse Middie.
Mev. Annika (Claassens) Prinsloo matrikuleer in 2008.
Mev. Rachelle (Deale) Adendorff en mej. Christelle le Roux skryf matriek in 2011. Juf. Rachelle onthou al die lekker tye op die netbalbaan en ook die netbaltoere. Hier by Middies het sy kosbare vriendskapsbande gesmee. Sy is steeds ‘n Middie, want “MHS is ‘n plek waar diverse individue gevier word en waar ons almal ‘n plek het”.
Mej. Michelle van Wyk skryf matriek in 2013 en haar kosbaarste herinnering is die onderwysers wat haar gevorm het om te wees wie sy vandag is. “It takes a village to raise a child” en daarom is sy so dankbaar dat MHS se onnies deel was van háár “village”. Sy wil graag dieselfde onderwyser wees wat Middies se onderwysers vir haar was. Sy wil graag deel wees van die nalatenskap van MHS. In haar eie woorde: “Groen bloed pomp in my are en pols murg en been deur my.”
Hierdie 15 onderwysers is beslis Middies 1000 en ons hoop hulle gaan nog vir lank diep spore trap hier in Middieland.

ARGIEF: Onnies in die kollig

Jare se hokkiesukses…
maar astro laat Wilke breed glimlag!

Annemarie Wilke MediumAnnemarie Wilke vertel dat haar loopbaan as hokkieafriger in 1989 by Hoërskool Middelburg begin het. “Daar was letterlik ’n fluitjie in my hand geprop en ek is in die rigting van die derde en vierde spanne beduie. Van die senuwees was my hande papnat gesweet.”

Ses-en-twintig jaar later en coach Meraai - soos die kinders haar noem - het ’n magdom provinsiale spelers én spanne op haar hokkiekerfstok. Veertien provinsiale én twee Noordvaaltrofees in die afgelope 12 jaar sorg ook dat haar vertoonkas kreun onder die gewig van al die silwerware.

Maar verlede Vrydag was haar glimlag net so groot as met enige van dié prestasies toe Middies se oefen-astrobaan amptelik geopen is.

“Dit is ’n groot droom wat waar geword het. Jy kan ál jou vaardighede op die baan oefen en dit is beslis tot voordeel van die spelers. Met die twee volsirkels kan spanne seweshokkie speel én agtsekondes-uitspeelstryde kan daarop beslis word. Die beter oppervlak sorg ook dat jou meer ingewikkelde hokkietegnieke - soos die drag flick en upright backstick - ingeskerp kan word,” vertel sy Woensdagoggend entoesiasties by skool.

Deur die jare was daar verskeie Middiespanne wat by die astro kon baat en niemand meer as die Predators van 2009-2013 nie. Van die 15 moontlike eindstryde waarin hulle kon verskyn, het hulle in 13 gespeel en 11 gewen. Spelers soos Marguerite en Marcia van Wyk, Nicola Alberts en Chanté Roos is al huishoudelike name in die Middiehokkiewêreld.

Volgens Wilke was die groep die sterkste wie sy nog afgerig het.



“Ek onthou veral die o/16 Noordvaaleindstryd in 2011 toe ons vir Menlopark 4-1 gewen het. Dan was Marguerite die beste speler met wie ek al gewerk het - as ons in haar jare die astro gehad het, sou sy waarskynlik haar o/18 SA-kleure ook gekry het.”



Haar sterk punt as afrigter is om kinders te motiveer en te help glo in hul vermoëns en doelwitte op die veld. “Ouerbertrokkenheid is ook baie belangrik. Hulle moet inkoop in die tipe hokkie wat die span wil speel.”

Deur die jare het daar al verskeie interessante oomblikke langs die hokkieveld plaasgevind - soos die keer toe sy as groentjie-afrigter saam die span ingelyf is.

 DSC 0089 Medium

“Die span moes my egter eers vang en hulle het my reg rondom die skool gejaag. By die B-rugbyveld het ek begin besef dat maak nie saak wat ek doen nie, hulle gáán my vaskeer. Ek onthou ek moes uiteindelik onder ’n oop kraan gaan lê!” vertel sy laggend.

Haar span van 2015 laat ook die prestasies inrol.

Hoewel hulle o/15 is, het vier van die spelers vir die o/16 provinsiale span uitgedraf. Boonop het hulle ses van die span se sewe doele tydens die nasionale week geskiet!

Maar wat doen jy as een droom ’n werklikheid geword het? Jy droom groter.

En Wilke en haar mede-afrigters by MHS droom nou van ’n vollengte astro.

• Annemarie Wilke loop al ’n lang pad in Middelburg. Sy was hoofmeisie van Laerskool Staatspresident C.R. Swart en het in 1982 by Hoërskool Middelburg gematrikuleer. Haar man, Pierre, is ook ’n hokkie-ringkop en is deesdae veral betrokke by haar spanne se motiveringsessies.

Chef se span kan kóók vanjaar


Gert van der Wetshuizen MediumDit is net na 14:00 op ’n Donderdagmiddag voor die Julievakansie en Gert van der Westhuizen is druk besig met skoolaangeleenthede in sy kantoor by Hoërskool Middelburg. “Dié is my eintlike werk,” sê die MHS-adjunkhoof terwyl hy na ’n hoop lêers en vorms op sy lessenaar kyk.

  Maar dan dra Van der Westhuizen (of Chef, soos hy bekend staan) ook die hoed van die Pumas se Cravenweekhoofafrigter. En dié hoed word vanjaar met baie trots gedra.

Die provinsie se hoërskoolbestes is vanjaar onoorwonne tot die aanloop van die nasionale week. Hulle het in drie vriendskaplike wedstryde met die Blou Bulle, Haaie en Leeus afgereken en veral hul aanvallende spel maak van hulle gedugte teenstanders.

Hulle beskik - soos Mfundo Ndlovu teen die Haaie bewys het - oor individuele briljantheid. Die voormalige Middievleuel het ’n driekuns van drieë teen die Kwazulu-Natallers gedruk en het verdedigers in die lug laat gryp met sy vaart en goeie hardlooplyne.

Dan sorg spelbrekers soos JC Pretorius en kie dat die span van enige plek op die veld ’n drie kan druk, terwyl die agterlyn - indien hulle die dag op hul stukke is - altyd ’n faktor is.

“Die span se teenaanvalle is briljant en die tempo waarteen die ouens speel, sorg dat ons altyd gevaarlik bly.”

Tog voel Van der Westhuizen dat hul verdediging nog nie heeltemal op standaard is nie. Juis om dié rede het hulle tydens verlede week se oefensessie, saam die professionele Pumas, veral op die aspek van die spel gekonsentreer.

Hoewel dit steeds belangrik is om ’n aanvallende speler se voete onder hom uit te duik, het die Sonny Bill Williams-aangee moderne spelers genoodsaak om hul verdedigingstrategieë aan te pas.

“Dit is een van ons mikpunte om vanjaar die beste span op verdediging by die Cravenweek te wees. Ons het onder andere gekyk om op ’n speler se bolyf toe te slaan om sodoende sy momentum te stuit en laat-aangeë te neutraliseer.”

Die toernooi word vanjaar in die Kaap beslis en Van der Westhuizen wil gereed wees vir enige moontlikheid - insluitende ’n nat Paarl. “Omdat ons reënweer verwag, het ons veral aan ons skopwerk geskaaf, terwyl ons ook op die vermoë om vanuit ons gebied te speel, gefokus het. Ons wil vanjaar in die hoofwedstryd op die laaste dag speel. Die span het die vermoë om dit te doen.”

Soos altyd sal hy ook sy spelers maksimum blootstelling wil gee om uiteindelik vir die SA Skolespan gekies te word.

“Daar heers ’n goeie gees onder die seuns. Daar is niks so goed soos ’n wen om jou selfvertroue op te bou nie.”

En die Pumas sal vanjaar wil aanhou wen.

• Pumas se uitslae in aanloop tot Cravenweek: 29-10 teen Blou Bulle 43-31 teen Haaie 35-29 teen Leeus

• Hulle sal voor die aanvang van die toernooi ’n oefenkamp by Alan Zondagh se sentrum bywoon.

• Die Cravenweek is van 13 tot 18 Julie by Paul Roos en hul eerste wedstryd is teen die Grens.

• Hoërskool Nelspruit se Coenie Kruger is die kaptein, met nóg ’n Laevelder, Wessel Muller, die onderkaptein.

• Van der Westhuizen se 2013 Cravenweekspan het die week in die derde plek afgesluit toe ’n Brandon Thomson-strafskop die Vrystaat in die doodsnikke van die hoofvoorwedstryd gesink het.

Christopher van Leeuwen is 'n MIDDIEMAN!


4c338c49b012f4e4c9b60e5148840f22

Na 53 minute se speeltyd in die openingswedstryd van hul Curriebekerveldtog teen die Valke op Kemptonpark, het die o/21 Pumas ’n agterstand van 17-42 in die gesig gestaar. ’n Rapsie onder dertig minute en vier drieë later, het hulle nie net die agterstand uitgewis nie, maar óók die wedstryd 43-42 gewen.

Nóú speel hulle Saterdag in die halfeindstryd van die reeks teen dieGriekwas op Mbombela. En Christopher van Leeuwen - die span se vuurvreterslot - glo dat die einste veggees wat hul vroeër die jaar op die Barnardstadion getoon het, hulle handig teen die Kimberleymanne te pas gaan kom.

“Ons is ’n span wat in mekaar en die afrigters glo. Die feit dat baie van die groep verlede jaar vir die o/19’s gespeel het, beteken dat ons mekaar goed ken.”

Dit is juis daardie verstandhouding onder die spelers wat gesorg dat hulle onoorwonne in die ligawedstryde geëindig het. In sewe kragmetings het hulle 288 punte aangeteken - die tweede meeste van al die spanne.

“Ons probeer in ’n wedstryd meer drieë as die ander span te druk!” skerts Van Leeuwen Woensdagoggend.

Tog is hul verdedigingsrekord nét so goed. Net die Limpopo Blou Bulle het minder punte in die reeks afgestaan.

Op 105 kilogram en 2.00m in sy sokkies, is Van Leeuwen een van die sleutelspelers in die span, en hy het veral sy stempel teen die Boland afgedruk. Die Wynboere was verlede jaar die o/19-kampioenspan en hulle is goed opdreef in vanjaar se kompetisie (hulle het byvoorbeeld 101-19 met die Grens klaargespeel), maar die Pumas het hulle egter 56-40 in Nelspruit kafgedraf.

Hoewel hy nie ’n drie in die wedstryd gedruk het nie, het hy die nodige vuur verskaf en sy skittervertoning het hom die titel as speler van die wedstryd besorg.

Die oud-Middieslot vertel dat die sprong van skoolrugby na die junior Curriebeker nie so moeilik was nie. “Ek was bevoorreg om vir twee jaar Cravenweek (2012 en 2013) vir die Pumas te speel wat ’n goeie leerskool was. Dus was dit nie só ’n groot aanpassing nie.”

Hy rig deesdae Hoërskool Middelburg se sterk o/15-rugbyspan af wat tot die kwarteindstryd van die Beeldtrofee deurgedring het. “Hulle is ’n baie goeie span wat vinnig toepas wat jy hulle leer.”

Maar terug na Saterdag se halfeindstryd. “Griekwas se verdediging is rotsvas en ons sal sterk met die bal in hand moet vertoon. Ons het hulle al egter vroeër 30-19 geklop. Die span het ook al gedurende die seisoen gewys dat ons onder druk kan presteer en ons weet wat om in sulke situasies te doen.”

’n Wen Saterdag sal wonders vir rugby in Mpumalanga beteken. En met van Leeuwen en kie in hul geledere, het die o/21 Pumas ’n groot kat se kans. • Van Leeuwen is volgende jaar ook die mede-afrigter van MHS se o/16’s. • Die o/21-kragmeting skop Saterdag om 15:15 af. • In sewe wedstryde het hulle 288 punte aangeteken, en slegs 174 afgestaan. Elandré Botha is met ses drieë die span se voorste driedrukker.